Феълдан англашилган ҳаракат-ҳолатнинг нутқ сўзланиб турган пайтга муносабати феъл замонлари, шундай маънони ифодаловчи қўшимчалар эса замон қўшимчалари дейилади.
Феълларда учта замон бор: 1) ўтган замон? 2) ҳозирги замон? 3) келаси замон. Бу уч хил маъно махсус қўшимчалар ёрдамида ифодаланади ва улар замон қўшимчалари ҳисобланади.
Ўтган замон
-ди, -иб (феъл унли билан тугаса -б), -ган эди, -ган экан қўшимчалари билан келиб, иш-ҳаракат ва ҳолатнинг нутқ жараёнидан олдин содир бўлганини ёки бўлмаганини билдирган феълларга ўтган замон феъллари дейилади.
Ўтган замон феъллари учала шахсда тусланади.
Масалан: бордим бординг борди бордик бордингиз борди (-лар)
Ҳозирги замон
-яп, -(а)ётир, -моқда қўшимчалари билан келиб, ишҳаракат ва ҳолатнинг нутқ жараёнида юз бераётгани ёки бермаётганини билдирган феълларга ҳозирги замон феъллари дейилади.
Келаси замон
-а /-й, -(а)р, -ажак, -моқчи қўшимчалари билан келиб, иш-ҳаракат ва ҳолатнинг нутқ жараёнидан кейин юз бериши ёки бермаслигини билдирган феълларга келаси замон феъллари дейилади.
Шахс-сон қўшимчалари
Феълдан англашилган иш-ҳаракат ва ҳолатнинг сўзловчи, тингловчи ёки ўзгага тегишли эканини билдирувчи қўшимчаларга шахс-сон қўшимчалари дейилади.
Сўзловчи 1-шахс, тингловчи 2-шахс, ўзга 3-шахс ҳисобланади.