Zulfiya (1915–1996) hayoti va ijodi. Зулфия хаёти ва ижоди. Zulfiya shoira.
Aziz o’quvchi! Balki Sizning maktabingizda yoki qo’shni maktablarda Zulfiya nomidagi Davlat mukofotiga sazovor bo’lgan qizlar o’qir. Siz, albatta, shunday mukofot borligini yaxshi bilasiz. U har yili respublikamizda ta’lim, fan, adabiyot, san’at sohalarida o’z iste’dodini namoyon etayotgan maktab, kasbhunar kolleji va akademik litseylar hamda oliy o’quv yurtlarida o’qiyotgan qizlarga taqdim etilishini ham eshitgansiz. Ana shunday nufuzli mukofot nega Zulfiya nomida, uning o’zi kim, qanday xizmatlari bilan bunday sharafga sazovor bo’lgan deb qiziqqan bo’lsangiz ham kerak? Keling, yaxshisi, hikoyamizni diqqat bilan o’qing!
| Zulfiya Isroilova xalqimizning atoqli va ardoqli vakili, O’zbekiston xalq shoiri, xalqaro «Nilufar», Javavoharlal Neru nomidagi hamda Davlat mukofotlari sohibasidir. |
U 1915-yili Toshkent shahrining qadimiy Dergez mahallasida tavallud topgan. Avval boshlang’ich maktabda, so’ng xotin-qizlar bilim yurtida tahsil olgan. 1935–1938-yillarda O’zbekiston Fanlar akademiyasining Til va adabiyot instituti aspiranturasida o’qigan. Shundan keyin turli nashriyotlarda ishlagan. 1953-yildan 1980-yilgacha, qariyb o’ttiz yilga yaqin respublikamizda keng tarqalgan «Saodat» nomli xotin-qizlar jurnalida bosh muharrir bo’lgan.
| Zulfiyaning dastlabki she’rlari «Hayot varaqlari» nomi bilan 1932-yilda bosilib chiqqan. Shundan so’ng shoiraning «She’rlar» va «Qizlar qo’shig’i» (1938-yil), «Uni Farhod der edilar» (1943-yil), «Hijron kunlarida» (1944-yil), «Dalada bir kun» (1948-yil), «Tong qo’shig’i» (1953-yil), «Yuragimga yaqin kishilar» (1958-yil), «Kuylarim sizga» (1965-yil), «O’ylar» (1965-yil), «Shalola» (1974-yil) kabi o’nlab she’riy to’plamlari chop etildi. |
U atoqli o’zbek shoiri Hamid Olimjon bilan oila qurgan. Biroq ular orzularga to’la hayot kechirayotgan pallada – 1944-yili mashina halokati tufayli turmush o’rtog’idan ayriladi. Shundan so’ng umr bo’yi o’z muhabbatiga sodiq qolib Hamid Olimjonning ishlarini sabot bilan davom ettiradi. Uning «Semurg’», «Zaynab va Omon» dostonlari asosida pyesa va opera librettolarini yaratadi. O’zi ham «Quyoshli qalam», «Mushoira», «Xotira siniqlari» kabi poemalar yozadi. Rus, ukrain, ozarbayjon, hind shoiralarining she’rlarini o’zbek tiliga tarjima qiladi.
Zulfiya keng tanilgan jamoat arbobi edi. U Osiyo, Afrika va Yevropaning o’nlab davlatlarida bo’lib xalqaro xotin-qizlar hamda adabiyot namoyandalarining harakatlarida faol ishtirok etar edi. Uning she’rlari ingliz, nemis, rus, bolgar, xitoy, hind, yapon, arab, fors, vetnam kabi juda ko’p xorijiy tillarga tarjima qilingan edi. Shoira 1996-yil 81 yoshida vafot etgan.
Savol va topshiriqlar
- Shoira Zulfiya qayerda tug’ilgan, qaysi o’quv yurtini tugatib,qanday faoliyat bilan shug’ullangan?
- Zulfiya qanday she’riy to’plamlar va dostonlar muallifi?
- Zulfiya Isroilovaning jamoat arbobi sifatidagi faoliyati haqidagapirib bering.
- Shoira asarlari qaysi xorijiy tillarga tarjima qilingan?
- Zulfiya mukofotiga kimlar sazovor bo’ladi?
