Tovushlar o‘pkadan chiqayotgan havoning og‘iz bo‘shlig‘ida to‘siqqa uchrashi yoki uchramasligiga ko‘ra ikki turli bo‘ladi: unli tovushlar va undosh tovushlar.
O‘pkadan chiqayotgan havo og‘iz bo‘shlig‘ida hech qanday to‘siqqa uchramay chiqishi natijasida hosil bo‘ladigan tovushlarga unli tovushlar deyiladi.
Tilimizda oltita unli tovush bor: a, o, e, o‘, u, i.
Mashq. Gaplardagi unlilarning ishlatilishiga alohida diqqat qiling.
1. Hurmat qilsang, hurmat ko‘rasan. 2. Kishining hurmati o‘z qo‘lida. 3. Ko‘z qayerda bo‘lsa, mehr ham o‘sha yerda bo‘ladi. 4.Mehrning xazinasi – til.
Savol va topshiriqlar
- Unli tovushlar deb qanday tovushlarga aytiladi?
- Tilimizda nechta unli tovush bor? Ularni sanab ko‘rsating.